د جون په ۷ مه، افغان یوټیوبر اجمل حقیقي – چې د خپل یوټیوب چینل او ماډلینګ خپرونو له امله مشهور و – په یو بل ډول خپرونه کې راڅرګند شو. طالب چارواکو اجمل حقیقي او د هغه درې ملګري ونیول او یوه ویډیو یې خپره کړه چې یاد کسان پکښی له ټپي مخونو او په ښکاره ډول تر فشار لاندې دي، وښودل، او د "فحاشۍ" او "قرآن کریم د سپکاوي" هڅولو له امله يې بښنه وغوښتله. د می په ۲۸، دغو څلورو کسانو په یوټیوب کې یوه ویډیو خپره کړې وه چې پکې دوی په عربي ژبه د قرآن کریم آیتونه په طنزیه انداز تلاوت کول. د یوې اونۍ په اوږدو کې، د طالبانو د استخباراتو عمومي ریاست (GDI) هغوی ونیول.
حقيقي په خپل لیکلي اقرار کې وویل: "موږ د لویدیځ کلتور او ارزښتونو ته وده ورکوو، او د دې لپاره زه بخښنه غواړم."
د جون تر نیمایي پورې، یاد کسان په توقیف کې پاتې شول. په هغوی باندې هیڅ تورونه په رسمي ډول ندي لګول شوي، او هیڅ مدافع وکیل یا د کورنۍ غړي یې نه دي توانیدلي چې هغوی سره لیدنه وکړي.
دا نیونې د بیان د آزادۍ په وړاندې د طالبانو د ځپونکو اقداماتو څخه دي. د می په ۲۴ مه طالب چارواکو د صدای افتاب راډیو مدیر میرزا حسنی په هرات ښار کې په یوه پوسته کې د مخالفو ډلو د ملاتړ په تور ونیوه. د می په ۱۰، د طالبانو د استخباراتو عمومي ریاست (GDI) چارواکو په ارزوګان کې د تلویزیون خبریال خان محمد سیال پرته له وضاحت څخه توقیف کړ. د جون په نیمایي کې، د دواړو کسانو څخه هیڅ یو خوشې شوی نه و.
د کندهار یو خبریال چې د اپریل په میاشت کې د موسیقۍ د خپرولو په تور څلور ورځې نیول شوی و، راته وویل چې له بهرنیانو سره په کار کولو تورن شوی و. د هغه هم "اعتراف" ته اړ ایستل شوی و: "هغوی (طالبانو) زه ووهلم او وټکولم او ما ته یې ویل چې زه باید اعتراف وکړم."
طالبانو په افغانستان کې د رسنیو د خاموشه کولو لپاره له مختلفو لارو چارو کار اخیستی دی، په کوم کې چې د محدودو لارښوونو له رامنځته کولو شروع کیږي او بیا د رسنیو له کارکوونکو سره د لیدنې لپاره د استخباراتي مامورینو د لېږلو پورې لارې چارې شاملې دي. د رسنیو د کارکونکو مجبورول چې په مشکوکو جرمونو اعتراف وکړي نورو ته دا پیغام رسوي چې د طالبانو قواعدو ته غاړه کیږدي – همدغه تاکتیک هم د ښځینه لاریون کونکو پروړاندې وکارول شو چې توقیف شوې وې او اعتراف کولو ته مجبوره شوې.
په هرات کې د رسنیو یوه کارکونکي په دې وروستیو کې ماته وویل، "په افغانستان کې د بیان ازادي مړه شوې ده." د ژورنالیستانو، د ټولنیزو رسنیو فعالینو او نورو لپاره چې په عامه توګه د طالبانو د سختو بندیزونو په وړاندې مقاومت کوي، د هغه خبرې خورا ریښتیا ښکاري.
