(Jakarta) – Sukad sa iyang paglingkod niadtong Hulyo 2022, wala giundang ni Presidente Ferdinand Marcos Jr. ang “gyera kontra droga” sa gobyerno, nga nisangpot nas kamatayon sa liboan ka mga tawo, nagkanayon ang Human Rights Watch karong adlawa sa iyang World Report 2023. Kinahanglan dayag nga mandoan ni Marcos ang nasudnong kapulisan nga undangon ang dugoong mga ronda kontra droga isip kabahin sa iyang gipahayag nga pasalig nga ibalhin ang pagtagad ngadto sa rehabilitasyon sa mga tiggamit og droga.
“Si Marcos sige’g sulti ngadto sa mga langyawng lider nga andam niyang palamboon ang kahimtang sa tawhanong katungod sa Pilipinas, apan dili kini mahitabo samtang ang kapulisan nagapamatay sa mga tiggamit og droga ug dili masilotan,” nag-ingon sa Phil robertson, deputy Asia director sa Human Rights Watch. “Adunay bulawanong kahigayonan si Marcos aron ipamatood nga seryoso siya mahitungod sa tawhanong katungod pinaagi sa pagmandong undangon ang ‘gyera kontra droga’.”
Sa 712 ka pahinang World Report 2023, ang iyang ika-33 nga hulad, girepaso sa Human Rights Watch ang mga hinimoan sa 100 ka nasud sa tawhanong katungod. Sa iyang pasiuna, nagkanayon si acting Executive Director Tirana Hassan nga sa usa ka kalibutang adunay pagbalhin sa gahum, dili na posibleng magsalig sa usa ka gamayng grupo sa mga gobyerno sa Amihanan aron panalipdan ang tawhanong katungod. Ang paglihok sa kalibutan alang sa Ukraine nagpahinumdum kanato sa talagsaong potensyal kung ang mga gobyerno makaamgo sa ilang mga obligasyon ngadto sa tawhanong katungond sa tibuok kalibuta. Ang kaakuhan anaa sa tagsa-tagsa ka nasud, dagko ug gagmay, nga himoong kabahin sa ilang mga palisiya ang tawhanong katungod, unya magtambayayong sa pagpanalipod ug pagduso sa tawhanong katungod.
Sa mga publikong pamahayag ug sa mga panagtagbo uban ang mga langyawng lider, si Marcos nagkanayon nga iyang ipadayon ang “gyera kontra droga” nga nasunod niya sa iyang gisundan, Rodrigo Duterte, apan ibalhin ang pagtagad ngadto sa rehabilitasyon sa mga tiggamit og droga. Hangtud karon, ang pagpamatay sa mga gipasanginlang tigbaligya ug tiggamit og droga nagpadayon, ug wala pa nahimo ang mga gikinahanglang reporma ngadto sa kasamtangang mga programa sa rehabilitasyon. Gisaway sa mga grupong human rights ug mga nagduso og reporma sa palisiya sa droga nga ang kasamtangang mga programa nakapunting sa pagpugos ug pagsilot, ug nagkanayon nga kini nagbutang sa mga tiggamit og droga sa kaulaw.
Sukad sa 2016, ang kapulisan sa Pilipinas niangkon sa ilang kalabutan sa kamatayon sa sobra 6,200 ka tawo sa mga ronda kontra droga sa tibuok nasud. Sa usa ka taho niadtong 2020, ang United Nations Office of the High Commissioner for Human Rights (OHCHR) nagkanayon nga 8,663 ang kamatayong nahitabo sa “gyera kontra droga.” Ang Human Rights Commission sa Pilipinas ug mga lokal nga grupong human rights nagataho og gidaghanon sa namatay nga doble ngadto sa triple ang kadaghan kaysa numero gikan sa UN. Ang Office of the Prosecutor of the International Criminal Court niadtong Mayo 2021 nagsumite og hangyo aron buksan ang usa ka imbestigasyon kung nahimo ba ang mga krimen batok sa katawhan panahon sa kampanya batok droga.
