GIDAKOP sa kapulisan niadtong Lunes si Walden Bello, usa ka 76-anyos nga aktibista, akademiko, ug kanhing magbabalaod, są iyang pinuy-anan są Quezon City są kasong cyber-libel. Ang pagdakop nagsumikad sa mga pasangil ni Jefry Tupas, usa ka kanhing information officer ni Bise Presidente Sara Duterte.
Sa bilanggoan nagpalabay si Bello sa kagabhion sa wala pa siya gibuhian human nibayad og piyansa.
Si Tupas, kinsa nagtrabaho ubos kang Duterte sa dihang mayor pa kini sa Davao City, nipasaka og duha ka kasong cyber-libel batok kang Bello sa Marso tungod sa usa ka pasangil nga nigawas sa Facebook nga si Tupas nalambigit sa gidiling druga human nitambong są usa ka salo-salo niadtong Nobyembre 2021 nga gìronda sa kapulisan.
Si Bello, usa ka progresibong tingog nga inila sa Pilipinas ug Timogsilangang Asya, nidagan apan napildi sa pagka bise presidente adtong Mayo. Gigamit niya ang iyang kandidatura isip plataporma aron mahataga’g pagtagad ang mga isyung progresibo ug mahitungod sa katilingbanong hustisya panahon sa kampanya. Usa siya ka dugay nang kritiko ni anhing Ferdinand Marcos, amahan ni Presidente Ferdinand Marcos Jr, ug ni kanhing Presidente Rodrigo Duterte, amahan ni Bise Presidente Duterte. Gipanghimakak ni Sara Duterte nga may kalabutan siya sa kasong libelo.
Ang balaod sa cyber-libel sa Pilipinas, gipasar niadtong 2012, kadaghan nang gigamit batok sa mga tigbalita, kolumnista, kritiko sa gobyerno, ug mga ordinaryong tiggamit sa social media. Ang Office of Cybercrime sa Kagawaran sa Hustisya nitaho nga 3,700 ka kasong cyber-libel na ang napasaka hangtud Mayo 2022. Sa maong gidaghanon, 1,317 ang gipasaka sa hukmanan samtang 1,131 ang gitaktak. Napulog duha ka kaso ang nisangpot są desisyong sad-an ang akusado.
Ang pagdakop kang Bello naghatag og gibug-aton są panginahanglan nga matangtang ang mga balaod sa criminal libel ug cyber-libel sa Pilipinas ug ubang dapit. Sama sa giingon sa United Nations Human Rights Committee sa iyang kinatibuk-ang komento mahitungod sa kagawasan sa pagpadayag, “bisan kanus-a ang pagbilanggo dili tukmang silot” alang sa pagdaut sa dungog. Ang UN special rapporteur on freedom of expression, Irene Khan, nagkanayon niadtong Hulyo human ang usa ka hukmanan sa Manila nibarog sa desisyong sad-an si Nobel Prize laureate Maria Ressa sa kasong cyber-libel, “Ang balaod sa criminal libel walay lugar sa usa ka demokratikong nasud ug angay nga wagtangon.”
Sama sa giingon sa Human Rights Watch sa wala pa gipasar ang balaod, ang criminal libel — batok sa gipadayag ginamit ang internet o ubang pamaagi — nakadaut sa gawasnong pagpamulong ug kanunay gigamit batok sa mga kritiko sa mga opisyal sa gobyerno. Ang mga balaod sama sa cyber-libel law angay usbon aron mawagtang ang mga probisyon nga krimen ang pagdaut sa dungog, subay sa mga internasyonal nga sumbanan sa tawhanong katungod ug gawasnong pagpamulong.
