II. Mga Pamamaraan

Ibinatay ang ulat na ito sa pananaliksik na ginawa sa loob ng dalawang taon, kasama ang field research at pakikipagpulong sa mga opisyal ng gobyerno sa Saudi Arabia noong Marso 2002 at Disyembre 2006, at sa Sri Lanka noong Nobyembre 2007 at Oktubre-Nobyembre 2006. Ginawa ang research sa Saudi Arabia bilang bahagi ng pagbisita ng delegasyon ng Human Rights Watch na inimbitahan ng gobyernong Saudi at kung saan ang Saudi Human Rights Commission ang nagsilbing host.

Dagdag sa ginawang field research, sinuri din namin ang mga umiiral na batas at regulasyon, nirepaso ang mga ulat sa mga pahayagan, at inusisa ang mga pag-aaral na ginawa ng gobyernong Saudi, mga organisasyong internasyunal, at civil society. Bagaman nakakuha kami ng datos at kopya ng mga regulasyon matapos humiling sa mga gobyerno ng Saudi Arabia, Indonesia, Sri Lanka, Pilipinas, at India, hindi naman kami nakakuha ng anumang sagot sa ilang impormasyon na aming hiniling. Dahil dito, may mga butas ang ulat na ito sa mga hindi namin nakuhang orihinal na ligal na mga dokumento o mga pinakabagong istatistiko ng mga nasabing gobyerno.

Sa isang pagkakataon, binisita ng isang mananaliksik ng Human Rights Watch noong ika-6 ng Disyembre 2006 ang Ministry of Social Affairs (MOSA) center para sa mga domestic worker na nasa Riyadh. Sa kabila ng pangakong open visit kung saan maaaring suriin ng researcher ang pasilidad at kapanayamin ang mga kinakanlong na migrant worker, may nakapagsabi sa amin na pansamantalang inilipat ng staff ang ilan daang kababaihan mula sa pasilidad upang magmukhang iilang dosena  lamang ang laman ng nasabing shelter. Inilipat din nila ang lahat ng residenteng nakatigil na roon ng ilang araw, siguro upang maitago ang tunay na kalagayan kung saan ang mga kababaihan ay tumatagal doon ng ilang linggo o buwan at punong-puno ang pasilidad.[3]

Isang sentral na aspeto ng aming pamamaraan ang malalimang panayam sa mga domestic worker na kasalukuyang nagtatrabaho sa Saudi Arabia o katatapos lamang magtrabaho doon. Kinapanayam din namin ang mga recruitment agent, mga kasapi ng Civil Society, at mga opisyal ng gobyerno. Ilan sa kanila ang nagsalita mula sa perspektibo ng pagiging amo ng domestic worker. Nabigo kaming makahanap ng amo na handang humarap sa isang pormal na panayam ng Human Rights Watch. Subalit marami kaming naging impormal na pakikipag-usap sa mga amo tungkol sa kanilang karanasan sa pagkakaroon ng domestic worker at sa pananaw nila sa mga karaniwang gawi hinggil sa mga domestic worker, tulad ng pagkuha ng pasaporte ng mga ito.

Hindi na namin sinuri ang kalagayan ng ibang manggagawa sa bahay tulad ng mga drayber at hardinero, pero tumutok kami sa kababaihang nagtatrabaho sa loob ng bahay tulad ng mga yaya, katulong, at tagapag-alaga ng matatanda at may sakit.

Hindi ibig sabihin na kinakatawan ng mga nakapanayam naming mga domestic worker ang lahat ng domestic worker sa Saudi Arabia. Tumutok kami sa karanasan ng mga inabuso, ang balangkas ng mga regulasyon na naglalapit sa kanila sa pang-aabuso, at sa tugon ng awtoridad sa mga indibidwal na kaso. Karamihan sa nakapanayam naming domestic worker ay mula sa hanay ng mga humingi ng tulong sa gobyernong Saudi tungkol sa hindi binayarang sahod, problema sa immigration, o iba pang isyu. Mas malawak ang saklaw ng karanasan para sa mga nakapanayam namin sa Sri Lanka, kasama ang sinumang domestic worker na umuwi mula sa Saudi Arabia noong nakaraang taon. Kasama sa aming kinapanayam ang mga:

Domestic Workers: Nagsagawa ang Human Rights Watch ng malaliman at indibidwal na panayam sa 86 kababaihang domestic worker na may edad mula 17 hanggang 52 taon. Karamihan sa kanila ay may edad na 22 hanggang 35 taon.

• Nakapanayam namin ang 64 domestic worker sa Saudi Arabia :  20 na Sri Lankan, 20 ang Pilipina, 22 ang Indonesian, at dalawa ang Nepalese. Ginawa ang mga panayam sa mga embassy shelters sa Riyadh at Jeddah, sa MOSA shelter for domestic workers sa Riyadh, at sa mga pribadong bahay. Nakapanayam namin ang 52 domestic worker noong Disyembre 2006 at 13 domestic worker noong Marso 2008, kasama ang tatlo sa mga nakapanayam namin noong 2006.
• Nakapanayam namin ang 22 na bagong uwing domestic worker sa Sri Lanka noong Nobyembre 2006. Nakapagsaliksik kami sa pito (7) sa walong (8) pangunahing distrito na nagpapadala ng kababaihang migrante sa ibang bansa. Ginawa ang mga panayam sa mga pribadong bahay, opisina ng mga labor recruitment agencies, pre-departure training centers, at sa Colombo airport shelter for returning workers.

Naglunsad din kami ng apat na group interviews sa mga domestic worker sa Saudi Arabia noong Disyembre 2006 at Marso 2008. Nasubaybayan din namin ang dose-dosenang kaso ng pang-aabuso sa tulong ng mga kontak sa mga NGOs sa mga nagpapadalang bansa, opisyal ng mga embahada sa Saudi Arabia, at mula sa mga press reports.

Sa ilang mga kaso, hindi namin obhetibong mapatotohanan ang ilang detalye ng pang-aabusong iniulat sa amin.  Subalit kung titingnan ang mga padron (pattern) o pagkaka-pare-pareho at pagtugma ng mga salaysay ng mga kinapanayam na hindi naman nagkaka-usap o magkakilala, hindi namin  mapagdududahan ang kredibilidad ng mga ulat na ito.

Recruitment agents: Naglunsad ang Human Rights Watch ng walong (8) indibidwal at pang-grupong panayam sa 13 labor recruitment agent. Ipinipagpatuloy namin ang pakikipag-ugnayan sa ilan sa mga ahenteng ito sa pamamagitan ng email at telepono matapos ang inisyal na panayam.

• Anim (6) na Saudi labor agent sa isang group interview na ginawa sa Chamber of Commerce, Riyadh noong Disyembre 2006.
• Pitong (7) Sri Lankan labor agent (mga ispesyalista sa Saudi Arabia) na ginawa sa Colombo at Kurunegala, Sri Lanka noong Nobyembre 2006 at Nobyembre 2007.

Mga opisyal ng gobyerno: Nagsagawa ang Human Rights Watch ng 39 na indibidwal at group interviews sa hanay ng mga opisyal ng gobyerno.

• Labing-anim (16) na panayam sa mga indibidwal at grupo sa hanay ng opisyal ng gobyernong Saudi noong Disyembre 2006 at Marso 2008; kasama ang mga ministro at ilang senior officials mula sa Ministries of Labor, Social Welfare, at Foreign Affairs; mga opisyal mula sa Ministry of Interior, Al Hair Prison, at mga opisyal ng pulis na humahawak ng kaso ng mga domestic worker; at mga commissioner mula sa Saudi Human Rights Commission.
•  Labing-pitong (17) panayam sa mga indibidwal at grupo sa hanay ng mga opisyal ng mga embahada at konsulado ng Indonesia, Pilipinas, Sri Lanka, Nepal at India noong Disyemre 2006 at Marso 2008, kasama ang mga ambassador, labor attaché, legal counsel, at social welfare officers.
• Anim (6) na panayam sa mga indibidwal at grupo sa hanay ng senior officials mula sa Sri Lanka Ministry of Foreign Employmant, Ministry of Foreign Affairs, Ministry of Labor, at sa Sri Lanka Bureau of Foreign Employment sa Colombo noong Nobyembre 2006 at Nobyembre 2007.

Civil Society: Nakapanayam ng Human Rights Watch ang pitong (7) aktibista sa Saudi Arabia noong Disyembre 2006 at Marso 2008, kasama ang mga indibidwal na kasali sa mga impormal na network to tumutulong sa mga inabusong domestic worker.

Karaniwang tumatagal ng halos 45 minuto hanggang isang oras at kalahati ang aming panayam sa mga domestic worker. Kasama sa mga itinanong ang mga dahilan ng kanilang pagpunta sa Saudi Arabia, proseso sa recruitment na kanilang dinaanan, kalagayan sa lugar na pinagtatrabahuan, pagtrato sa kanila ng mga amo, at ang naging tugon ng gobyernong Saudi at ng sarili nilang mga bansa sa mga kaso ng pang-aabuso. Batay sa wikang gamit ng mga domestic worker, ginawa namin ang mga panayam na may pagsasalin sa pagitan ng Ingles at Arabic, Bahasa Indonesia, Sinhali, Tamil, at Tagalog. Ginawa din namin ang ilang panayam sa Ingles mismo.

Ginawa din namin ang mga panayam matapos naming makuha ang kanilang pagpayag, at matapos naming ipaliwanag ang Gawain ng Human Rights Watch at ipaliwanang ang pakay at planong pagbabandila ng ginagawang pagsasaliksik at ng ulat na lalabas mula dito. Wala kaming ibinigay na pera o ibang tulong bilang kapalit ng panayam. Mayron ding karapatan ang mga kinapanayam na tumanggi o itigil ang panayam ano mang oras.

Upang masiguro ang kaligtasan at hindi makilala ang mga kinapanayam naming babae, gumamit kami ng ibang pangalan para sa karamihan ng mga domestic worker na nakapanayam. Sa ilang kaso ay sila mismo ang humiling o nagbigay ng permiso na gamitin ang kanilang tunay na mga pangalan. Marami sa mga nakapanayam na opisyal ng mga foreign mission ang nagbigay ng detalyadong impormasyon, huwag lamang daw ibigay ang kanilang tunay na pangalan upang maiwasang masira ang relasyong diplomatiko ng kanilang bansa sa Saudi Arabia.