XII. Mga Detalyadong Rekomendasyon

Nagpakita na ng kaunting malasakit ang gobyernong Saudi tungkol sa pang-aabuso sa mga domestic worker, na ipinakita nito sa pagtatayo ng mga shelter ng Ministry of Social Affairs, mga panukalang baguhin ang Labor Code, at mga mensahe sa publiko na tumatalakay sa mas maayos na pagtrato sa mga domestic worker. Subalit kailangan pa ng mas sistematikong pagbabago sa lipunan.

Napakahalagang salik ang mga reporma sa sistema ng recruitment sa mga bansang pinagmulan at sa Saudi Arabia para siguraduhing makakakuha ang mga kababaihang migrante ng wasto at kumpletong impormasyon tungkol sa kanilang magiging trabaho, kopya ng kanilang kontrata sa wikang maiintindihan nila, at mga daan para makakuha ng tulong kung kailanganin nila ito. Susi din ang pagbabago ng mga patakaran sa labor at immigration: sa kasalukuyan ay inilalagay ng sistemang kafala at ng hindi pagsakop sa kanila ng mga batas paggawa ang mga migrant worker sa mataas na banta ng pagsasamantala. Bilang wakas, dapat na magpatupad ang gobyernong Saudi ng malawakang pag-aayos sa criminal justice system upang siguruhin na iyong mga domestic worker na hindi pinalad at makakaranas ng pang-aabuso ay makakahanap din ng hustisya.

Sa Gobyerno ng Saudi Arabia

Magbigay ng pantay at komprehensibong legal protection sa mga domestic worker, iskedyul sa pagpapatibay ng naturang mga proteksiyon, at mga kasangkapan sa pagpapatupad.

• Ipagpatibay ang panukalang annex sa labor law para makapagbigay ng proteksiyon sa mga domestic worker. Siguruhing gagarantiyahan ng amendment ang proteksiyong kapantay ng ibinibigay sa ibang manggagawa, kasama ang probisyon sa oras ng paggawa, pasahod, sahod kapag holiday, at kompensasyon sa manggagawa.
• Siguruhing ang panukalang annex ay maitataguyod at mapapatupad sa labor courts.
• Ayusin ang kakayanan ng mga domestic worker na makalapit sa mga labor court sa pag-resolba ng ailtan sa sahod at iba pang usapin sa paggawa.
• Ipatupad ang mga probisyon sa Civil Procedure Code na nangangailangan ng pinadaling pagbabayad sa sahod ng mga domestic worker na hindi nabayaran.
• Maglunsad ng mga iniuutos o mandatoryorientation program para sa mga among Saudi tungkol sa kanilang ligal na karapatan at obligasyon kapag sila ay uupa ng domestic worker, stratehiya sa pagharap sa hindi pagkakaintindihan na sanhi ng balakid sa komunikasyon at pagkakaiba sa kultura, at pagsangguni sa mga resources sakaling may lumabas na problema.
• Magsimula ng mga iniuutos o mandatory na orientation program para sa mga bagong dating na domestic worker tungkol sa kanilang mga karapatang ligal at obligasyon. Dapat na isama sa programa ang mga impormasyon kung saan sila makakakuha ng tulong sakaling may dumating na problema, pagsasanay sa karunungang pinansiyal sa paggamit ng bank account, impormasyon kung paano makipag-ugnayan sa kanilang pamilya, pagpapakilala sa mga opisyal ng kanilang embahada, at impormasyon tungkol sa mga batas ng Saudi, tulad ng mga gawing pinapayagan sa kanilang sariling bansa subalit ipinagbabawal sa Saudi Arabia.

Baguhin ang mga batas sa sponsorship na nagkakabit sa ligal na katayuan, kakayanang magpalit ng amo, at kakayanang umalis sa Saudi Arabia ng mga domestic worker sa kanilang mga amo.

• Baguhin o buwagin ang sistema ng kafala sponsorship upang ang mga pansamantalang visa na nakabatay sa employment ay hindi na nakatali sa iisang amo. Siguruhing makapagpapalit ng amo ang mga manggagawa nang hindi mawawala ang kanilang ligal na katayuan at hindi na mangangailangang kunin ang permiso ng kanilang amo.
• Tanggalin ang requirement na pagpayag o pirma ng amo sa exit visa ng mga domestic worker bago sila makalabas ng nasabing bansa.
• Bumuo ng isang lupon ng mga inspektor (inspection body) na mahigpit na magbabantay sa gawain ng mga recruitment agency kapag ito ang umako sa pag-sponsor sa mga dayuhang manggagawa gaya ng kasalukuyang panukala. Dapat na ang lupon na ito ay may kapangyarihang mag-imbestiga sa mga alegasyon ng masamang asal o gawi, at magpataw ng mga parusa, kasama ang pagbawi ng lisensiya ng ahensiya, pagpataw ng malaking multa, at pagsangguni ng mga kaso para sa kriminal na pag-usig.   Bumuo ng isang konseho na kakatawan sa lahat ng  sektor na apektado(stakeholder),kasama ang labor-sending na mga bansa at ang civil society. 
• Bumuo ng isang madaling buksan o puntahan at regular na binabagong database ng mga amo at kanilang manggagawa upang matunton ang mga amo kapag nawawala o hindi mapangalanan o maituro  ng mga domestic worker kung nasaaan  ang kanilang amo.
• Pagaanin ang mga hakbangin sa pagkuha ng awtorisasyon sa pagpapauwi ng labi ng mga migranteng namamatay sa Saudi Arabia.

Makipagtulungan sa mga labor-sending na bansa sa usapin ng mga nakakulong na mga dayuhang mamamayan.

• Ipagbigay alam sa mga embahada ang tungkol sa mga nakakulong na dayuhang mamamayan at pagsulong ng mga kriminal na paglilitis, gaya ng petsa ng hearing, sa napapanahong paraan at nakabatay sa Vienna Convention on Consular Relations.
• Maagap na ipaalam sa mga migranteng manggagawa ang kanilang karapatang makipag-ugnayan sa mga opisyal ng kanilang konsulado, at bigyan sila ng pasilidad para magawa ito.
• Makipagtulungan sa mga labor-sending na bansa sa paglunsad ng pagsagip ng mga domestic worker na ikinulong sa bahay ng kanilang amo at pinilit na ipagpatuloy ang pagtatrabaho kahit na labag sa kanyang kalooban. Padaliin ang mga hakbangin sa pagkuha ng awtorisasyon sa mga ganitong pagsagip.

Pagbutihin ang mga pasilidad at pamamaraan sa mga centers for domestic workers na pinapatakbo ng Ministry of Social Affairs

• Bigyan ang mga kababaihang nakatigil sa center ng mas malawak na kalayaan sa pagkilos at komunikasyon, kasama ang kakayanang tumawag sa kanilang mga pamilya at embahada, gumala sa labas, at tumangan ng mobile phone.
• Gawing computerized ang mga file para mapadali ang pag-proseso at pagsubaybay sa mga kaso, pagbahagi ng impormasyon sa ibang may kaugnayang awtoridad sa Saudi at sa mga labor-sending na bansa, at masubaybayan ang mga tunguhin (trends). Bumuo at ibahagi ang blacklist ng mga abusadong amo at recruitment agencies.
• Magtalaga ng propesyonal na mga interpreter sa anumang panayam o pulong na ukol sa kaso ng domestic worker at siguruhin na mayroong staff na nakakapagsalita ng lengguwahe ng domestic worker.
• Bumuo ng detalyadong intake form upang masiguro na lahat ng mahalagang isyu na naranasan ng domestic worker ay matutukoy sa oras na tanggapin ito sa center.
• Ihiwalay ang mga negosasyon ukol sa hindi nabayarang sahod at pondong pambili ng tiket pauwi, sa pagpayag ng amo na magbigay ng exit visa, upang maiwasan ang matinding kawalan ng balanse sa kapangyarihang makipagtawaran.
• Panatilihing palaging alam ng domestic worker ang katayuan ng kanyang kaso at ang mga hakbang na puwede niyang gawin.

Mahigpit na usigin ang mga amo at employment agent na ang pagtrato sa mga domestic worker ay sumusuway sa umiiral na batas ng bansa

• Imbestigahan, usigin, at parusahan ang mga maysala ng pisikal at seksuwal na karahasan laban sa mga domestic worker
• Payagan ang mga domestic worker na ilipat ang power of attorney sa kanilang embahada sa ganitong mga kaso upang sila ay makauwi na at maiwasan ang matagal na paghihintay sa mga shelter.
• Imbestigahan, usigin, at parusahan ang mga maysala ng pag-abuso sa karapatan sa paggawa, na sumusuway sa umiiral na batas sa bansa.
• Pabigatin ang parusa sa mga abusadong amo, na hihigit sa pagbabawal na muling kumuha ng domestic worker sa hinaharap.
• Bigyan ng pagsasanay ang mga pulis sa pagtukoy at pag-imbestiga ng pang-aabuso sa mga domestic worker at mga pamamaraan sa pagtugon sa ganitong mga situwasyon, at pag-alok ng mga angkop na sanggunian. Turuan ang mga pulis at immigration authorities tungkol sa kahalagahan ng hindi pagsasauli ng mga domestic worker sa mga abusadong amo na labag sa kagustuhan ng manggagawa, at siguruhing pamilyar sila sa mga hakbangin sa pagsampa ng kaso laban sa mga amo at labor agent.
• Baguhin ang criminal justice laws, kasama ang evidence laws na nagpapahirap sa pagpapatunay ng panggagahasa, pagpaparusang kriminal sa mga gawain at desisyon ng dalawang magsang-ayon na taong nasa tamang gulang (adult consensual behavior), at arbitraryong pagpaparusa sa diumanoy pangkukulam o "black magic."

Palakasin ang regulasyon at pagsubaybay sa mga recruitment agency

• Pagbutihin ang pagsubaybay ng Ministry of Labor sa mga recruitment agency, kasama ang sa pamamagitan ng pagpapalaki ng bilang ng mga inspektor at biglaang inspeksiyon.
• Palakasin at gawing propesyonal ang mga pamamaraan sa recruitment, paglipat, paghawak ng alitan sa pagitan ng amo at manggagawa, at sistema ng pagsangguni sa mga awtoridad ng Saudi at embahada ng mga labor-sending na bansa.
• Pag-aralan ang isang insurance program para sa mga amo upang kanilang mabawi ang nawalang recruitment fee sa kalagayang wala silang nagawang pagsuway sa paggawa o pang-aabuso at maagang pinutol ng domestic worker ang hanyang pagtatrabaho.

Tuparin ang mga pandaigdigang pamantayan sa human rights

• Ratipikahan ang Convention on the Protection of the Rights of All Migrant Workers and Members of their Families (Migrant Workers Convention) at mahahalagang ILO conventions ng walang pag-aalinlangan. Tuparin ang pangangailangan sa pag-uulat ng nasabing lupon ng tratado.
• Tuparin ang mga rekomendasyon na inilabas na ng Committee on the Elimination of Racial Discrimination (CERD) ukol sa pagbuwag sa gawi na kung saan hinahawakan ng mga amo ang pasaporte ng empleyado, at ng Committee Against Torture (CAT) ukol sa pagkuha  ng proteksiyon mula sa mga konsulado para sa mga domestic worker na nakakulong.
• Alisin ang malawak ng reserbasyon sa Convention on the Elimination of All Forms of Discrimination Against Women (CEDAW) at Convention on the Rights of the Child (CRC).
• Magpadala ng imbitasyon sa UN special rapporteurs on the human rights of migrants and on trafficking upang dumalaw at mag-imbestiga sa kalagayan ng mga domestic worker.

Sa mga Gobyerno ng Bansang Pinanggagalingan ng mga Migrante (kasama ang Indonesia, Sri Lanka, Pilipinas, at Nepal)

Palakasin ang regulasyon at pagsubaybay sa mga recruitment agent.

• Magtakda ng malinaw na itinakdang pamantayan sa mga bayarin at gawi sa recruitment upang mabawasan ang sobrang pagsingil at panloloko ng mga lokal na brokers at sub-agents; at siguruhing ang mga sub-agent na susuway sa mga patakaran ay haharap sa may kabuluhang parusa.
• Magbuo ng mga mekanismo para sa regular at independiyenteng pagsubaybay sa mga labor agency at hawak na mga sub-agent. Maglunsad ng biglaang inspeksiyon ng mga recruitment agency.
• Magtayo ng sistema ng pag-monitor kung saan iuulat ng mga domestic worker sa gobyerno ang halagang binayaran nila sa recruitment agent bago sila nangibang bayan.
• Mahigpit na ipunin at imbestigahan ang mga reklamo tungkol sa mga dayuhang mamamayanna pinagtatrabaho sa mga labor agency sa mga bansang pinagtatrabahuan. Bumuo ng mga pamamaraan na magbibigay daan sa mga domestic worker na i-rehistro ang impormasyong ito sa mga dayuhang mission sa mga bansang pinagtatrabahuan at sa kanilang pag-uwi.

Ayusin ang serbisyo para sa mga migranteng domestic worker sa mga opisina ng mga embahada at konsulado sa Saudi Arabia.

• Magbahaginan ng impormasyon sa pagitan ng mga embahada at awtoridad ng Saudi tungkol sa mga amo at recruitment agency na nasa blacklist.
• Palakihin ang bilang ng mga may kasanayang staff na aasikaso sa mga migranteng domestic worker na humihingi ng tulong, laluna sa larangan ng pagsingil sa sahod, pag-imbestiga at pag-usig sa sinususpetsang pang-aabuso, at karapatan habang nakakulong.
• Maglunsad ng mga pagsasanay na may mandato para sa lahat ng antas ng staff na nakadestino sa Saudi Arbia tungkol sa karapatan ng mga domestic worker at kung paano sila tulungan. Dapat na magbigay ng malakas na senyales ang mga ambassador na ang mga migranteng domestic worker ay mga mamamayan na may karapatan sa tulong ng konsulado, patingkarin ang kontribusyon ng mga domestic worker, at maglunsad ng pasinaya para sa mga ito.
• Ayusin ang kalagayan sa mga shelter at safe house sa pamamagitan ng pagsasanay ng staff, pagbibigay ng trauma counseling at pangangalaga sa kalusugan, at pagpapaluwag sa masikip na kundisyon.
• Paunlarin ang sistema ng pana-panahong pagsiyasat sa kagalingan ng mga domestic worker na una nang nakipag-ugnayan sa mga dayuhang mission para humingi ng tulong.
• Magbigay ng serbisyo tulad ng lingguhang pagsasanay o klase sa Arabic upang bigyan ang mga amo ng insentibo na bigyan ng lingguhang day off ang mga mangggawa.
• Siguruhing mayroong 24-hour assistance hotline at/o may nakahandang staff 24 oras bawat araw para sa mga domestic worker na tumatakas sa mga abusadong amo.

Dagdagan ang mga pre-departure na pagsasanay sa mga domestic worker.

• Dagdagan ang kamulatan sa karapatan at dayuhang wika na mga bahagi ng pagsasanay
• Mabigay ng mas detalyadong impormasyon tungkol sa mga mekanismo sa bayad-pinsala ng kung paano magpatuloy ng kaso laban sa mga amo at labor arbiter sa mga bansang pinagtatrabahuan, at maging sa pag-uwi.
• Magbigay ng impormasyon tungkol sa ligal na limitasyon sa recruitment fee at mekanismo sa paghahapag ng reklamo laban sa mga recruitment agent na lalabag sa batas.
• Siguruhing tatanggap ang mga paalis na domestic worker ng information kit na naglalaman ng pangalan, address, at telephone number ng kanilang amo; address at telephone number ng embahada; pangalan, address, at telephone number ng kanilang labor agency na nakabase sa bansang pinagtatrabahuan; isang mobile phone o telephone card na may pre-programmed na number ng embahada; kaunting pera na nasa local currency; kopya ng kanilang pasaporte; at kopya ng kanilang employment contract na nakasulat sa Arabic at sa pangunahing wika ng domestic worker.

Palawakin ang mga programang nagpapataas ng kamulatan ng publiko para sa mga nagbabaka-sakaling maging migranteng domestic worker.

• Puntiryahin ang mga bayan at lokal na mga lugar na pinagtatrabahuan ng mga nagbabakasakaling migranteng domestic worker para ipaalam sa kanila ang ligal na limitasyon sa recruitment fee at mga patakaran sa kontrata sa paggawa sa Saudi Arabia.
• Makipagtulungan sa mga grupong nagtatrabaho para sa karapatan ng mga migranteng manggagawa upang maipakalat ang ganitong impormasyon sa hanay ng mga nagbabakasakaling migranteng domestic worker bago pa man sila magdesisyong mangibang bayan at lumapit sa labor agency.
• Palawakin ang oportunidad sa edukasyon at trabaho para sa mga kababaihan upang sila ay makapangibang-bayan batay sa malayang pagpili  at hindi dahil sa kanilang desperasyon.

Sa Lahat ng mga Gobyerno

Magtulungan para makabuo ng kontrata sa paggawa na kinikilala ng bawat isa at maipapatupad, naisalin sa salitang Arabic at sa wikang naiintindihan ng domestic worker.

Magtulungan para makabuo ng mekanismo na magsisiguro ng bayad-pinsalasa mga manggagawang may reklamo, kasama ang panahon na nakauwi na ang mga ito.

Magpaunlad ng isang sistema sa pagpapalaya ng mga domestic worker na ikinulong sa lugar na pinagtatrabahuan at walang paraang makatakas. Makipagtulungan sa pagitan ng mga lokal na nagpapatupad ng batas, dayuhang misyong diplomatiko, at NGOs kung kinakailangan. Ang mga halimbawa nito ay ang pagbibigay sa mga domestic worker ng mobile phones, pagtataguyod ng multilingual hotlines (kasama ang text message hotlines), at pagpapatupad ng mga pamamaraang may takdang oras ng pagtugon.

Aktibong humingi ng input mula sa mga migranteng domestic worker at civil society sa pagbuo at pagsasakatuparan ng mga patakaran.

Sa International Labour Organization (ILO) at International Organization for Migration (IOM)

Dapat magpatupad ang ILO ng isang Convention on Domestic Work sa darating na pagsisiyasat nito sa domestic work bilang isang standard-setting na isyu sa gagawing International Labour Conference sa 2010. Dapat na bumuo ang ILO ng mga patnubay sa pagsasama-sama ng mga probisyong ito na maging batas ng mga bansa, isang huwarang kontrata sa paggawa para sa mga domestic worker, at mga kasangkapan sa pagsubaybay at pagpapatupad.

Makipagtulungan sa mga lokal na grupo para mapalawak ang mga teknikal na programang nagbibigay ng pagtuturo ng karapatan sa paggawa sa mga migranteng manggagawa tungkol sa pandaigdigang pamantayan sa paggawa at sa kanilang karapatan sa ilalim ng batas ng Saudi Arabia.

Makipagtulungan sa mga gobyerno upang makapagbigay ng teknikal na tulong at partikular na wika upang palakasin ang mga regulasyon sa paggawa, pamantayan sa recruitment, at pagpapatupad na naaayon sa mga pandaigdigang pamantayan sa paggawa.

Makipagtulungan sa mga gobyerno upang pataasin ang kooperasyon sa antas ng rehiyon at bumuo ng minimum standard para sa panandaliang labor migration, kasama ang paggamit sa Colombo Process, ang Gulf Forum on Temporary Contractual Labourers, at ang Global Forum for Migration and Development.

Makipagtulungan sa mga trade union sa paglulungsad ng outreach at mobilisasyon na patungkol sa mga domestic worker.

Sa mga Donor tulad ng World Bank at mga Private Foundations

Magbigay ng mas malaking pinansiyal at institutional na suporta sa mga lokal na NGO at iba pang pagsisikap ng civil society sa pagbabandila at pagbibigay-serbisyo para sa mga migranteng domestic worker. Kasama rito ang suporta sa paglahok sa mga prosesong pang-rehiyon, at pinalawak na networking sa pagitan ng civil society groups sa mga labor-sending at labor-receiving na mga bansa.

Dagdagan ang resources para sa pasilidad ng mga shelter at may kasanayang staff, kasama ang mga social worker, para sa mga domestic worker at dayuhang mission.

Pondohan ang mga microcredit lending programs na nagbibigay ng mas paborableng interest rate para sa mga kababaihang nagbabalak mangibang bayan, upang masagot ang gastos sa pangingibang bayan.

Pondohan ang mga pangmatagalang domestic employment strategies para sa mga kababaihan, katulad ng mga proyektong magpapaunlad ng tuloy-tuloy na gawaing kumikita (income-earning activities) sa kanilang mga sariling bansa.